ජීවිතයට මිනිත්තුවක් - බිරිඳ නොහොත් අම්මා

ප්‍රේමය ගැන, පෙම්වතිය ගැන කොච්චර නම් ගීත ලියැවිලා තියෙනවද! ඒත් ඒ පෙම්වතියම බිරිඳක් උනාම ඇය ගැන ගීත ලියැවෙන්නේම නැති තරම්. විවාහ ජීවිතය ඒ තරම්ම කටුකද? නීරසද?

සුනිල් ආරියරත්නයන් ලියූ අමරදේවයන්ගේ හඬින් රෝහණ වීරසිංහයන්ගේ තනුවට ගැයෙන මේ ගීතය තරම් ලස්සනට බිරිඳකගෙ ආදරය ගැන ලියවුණු ගීතයක් තවත් නෑ.

තාත්තා වුනත් මා බත සරිකරන

අම්මා නුඹයි මගෙ දරු දැරියන් රකින ...

මට පෙර උරුම ආලය දරුකැලට දෙමින්

රෑ දාවල් දෙකේ වෙහෙසෙන විටදි නොමින්

ඔබ දුටු මුල් දිනේවත් හදනොනැඟි පෙමින්

උතුරයි මසිත තව නුඹ වෙත තුරුළු වෙමින්

තමන්ට පණ වගේ ආදරය කරපු ඒ ළබැඳියගෙ ආදරය බෙදිල, ඒකෙන් ලොකු පංගුව දරුවන්ට දෙනකොට තාත්තා කෙනෙත්ට දුකක් දැනෙන එක අසාදාරණ නෑ. ඒක ආත්මාර්තකාමීකමක් නෙමෙයි. ආදරය එහෙමයි. නමුත් තමන්ට හිමිව තිබූ ඒ ආදරය වැඩි වැඩියෙන් දරුවන්ට දෙනකොට මේ තාත්තටනම් දුකක් දැනිල නෑ. කොච්චර අපූරුද!

බැතිබර හැඟුම් දනවන නුඹගේ සුවඳ

අතදරු පුතුගෙ මුව කමලේ ඇත නිබඳ

අම්මා කෙනෙක් මිස නුඹ මගෙ බිරිඳ ලෙස

නොහැගේ ලඟින් හිඳ මගේ හිස සිඹින සඳ..

බිරිඳකගෙ ආදරය ගැන කියන්න මේ අන්තිම පද දෙකට වඩා ලස්සන පද දෙකක් ලියන්න පුලුවන් සුනිල් ආරියරත්නයන්ටම පමණයි!

අහල නැතිනම් අද අහන්න.

ලසිත